बाइबल कहनी

एबस्र'आ ख़द्दस

ओन्टा आलास रहचस, आस हीं दुई झन ख़द्दर रहचर। उन्दुल सन्नी ख़द्दस तम्बस हेद्दे बर’अर की बाचस, “अना बाबा सम्पत्ति नु जे भगा एंगहय र’ई, अदिन ची चे’आ।” तम्बस आस गे आस हीं भगान ची चि’इदस। 

बग्गे उल्ला हुँ मल मंजा का सन्नी ख़द्दस तंगहय ढिबा गुट्ठीन हो’ओदस की गेच्छा राजी चाइल कालदस। एकाबारी आस हीं असन र’अते तंगहय हुरमी ढिबा अउर खुर्जीन मल दाव नलख़ नु मुंजियस चिच्चस। ख़ने आ राजी नु कोंहा अकाल बरचा। अउर आस कंगल मंजस केरस। आस गुसन ओना-मोख़ा गे ओन्टा हुँ ढिबा मल रहचा। औंगेना आस आ राजी ता ओरोत आलास गुसन केरस। आ आलास तंगहय ख़ल्ल नु आस गे किस्स ख़पना हीं नलख चिच्चस, आ सन्नी ख़द्दस एन्ने कीड़ा रहचस का  एका चारन किस्स मोख़ा लगिया आ चारन आस मोख़ार की कूलन उड़ता बेद्दा लगियस। लिकिन ने हुँ आस गे एन्द्रा हुँ मल चे’आ लगियर। आ बारी आस तंगहय ती सोचदस अउर तन-तानिम ब’आ हेलरदस। एम्बस हीं एड़पा नु नोकरहर गे कूल उड़ना ती बग्गे अस्मा ख़क्खर’ई। लिकिन एन इसन कीड़ा ती खे’अदन। एन अक्कुन चो’ओन की एम्बस गुसन कालोन अउर आसिन ब’ओन,  “बाबा एन धर्मेस हीं बिड़दो नु अउर निंगहय बिड़दो नु पाप नंजक’अदन। अक्कुन एन निंगहय बेटा ब’अना हीं जोग्गे मलकन का निंगहय ख़द्द बाता र’ओन, नीन एंगन ओरोत नोकरहा लेक्खा उईय्या।”

 आबारिम आस चो’ओदस की तम्बस गुसन किर्रदस की बरदस, एकाबारी आस गेच्छम रहचस ख़नेम तम्बस आसिन ईरयस की आस मंइय्याँ तरसारस। अउर बोंगते केरस की चूंख़ियस। आस तम्बासिन बाचस, बाबा एन धर्मेस हीं बिड़दो नु अउर निंगहय बिड़दो नु पाप नंजक’अदन। अक्कुन एन ई जोग्गे हुँ मलकन का निंगहय ख़द्द बतार’ओन। अउर तम्बस तंगहय नोकरहारिन बाचस, चाँड़े ती पुना किचरि अउर जुता ओथ्र’आ की ओन्द्र’आ अउर आसिन अत्त’आ अउर पोस्क’आ जानवर पिटा अउर कम’आ, होरमर गे बित’आ ओनोत-मोख़ोत अउर खुशी मनाब’ओत, एन्देरगेका एंगहय एंगदस केच्चक’आ केरका रहचस अउर उज्जयस केरस। एबस्रका रहचस आस अक्कुन ख़क्खरस केरस। इदि गे अबड़ार खुशमार’आ हेलरर। 

आबारी आस हीं  कोंहा ख़द्दस ख़ल्ल नु रहचस। आस पु्त्तबारी ख़ल्ल ती एड़पा हेद्दे अड़सदस, ख़ने आस गे आलार हीं अस्सना-पड़ना मिन्द्र’ई। आबारी आस ओन्टा नोकरहासिन मेख़दस की मेन्दस, इबड़ा एन्देर मना लागी? नोकरहस आसिन बाचस, निंगड़िस एड़पा किर्रक’आ बरचकदस। औंगेना निम्बस अदि हीं खुशी नु पोस्क’आ जानवर पिटताचक’अदस। एन्देरगेका आसिन दाव कोड़ेम ख़क्खियस औंगेना रीझ ती नला-तोका लगनर। एन्ने मेंजस की कोंहा ख़द्दस अज्जम कयरारस अउर एड़पा भितरे हुँ कोर’आ मल बिद्दयस। अउर तम्बस एड़पा ती बाहरी बरदस अउर आसिन भितरे बर’आ गे मनाब’अदस। आबारी आस तम्बासिन आनाकिर्तादस, एरा एन एन्ने बछार ती निंगहय सेवा ननादन अउर एका उल्ला हुँ एन निंगहय बाचक’आ कत्थान मल तड़चक’अदन। अन्नु हुँ नीन एंगागे इकला हुँ ओन्टा एड़ा ख़द्दन हुँ मल चिच्चक’अय का एन एंगहय संगि्गयर गने ओनोन-मोख़ोन पांहे। लिकिन निंगहय ई ख़द्दस सम्पत्तिन होच्चस की चाईल-चालन बिगड़रका पेल्लार गने मुंजियस की बरचक’अदस। नीन आस गे पोस्क’आ जानवर पिटताचक’अदय। तम्बस आसिन बाचस, “बेटा, नीन जिन्गी भइर एंगहय गने र’अदय; अउर जे एंगहय हेके आद हुरमी  निंगहय दिम गा हेके। लिकिन अक्कुन रीझिरना अउर खुशमारना हीं बेड़ा हेके, एन्देरगेका ई निंगड़िस केच्चक’आ केरक’आ रहचस अउर उज्जयस केरस। एबस्रका रहचस, अक्कुन ख़क्खरस केरस।